Höfuðstaður Norðurlands er frábær áfangastaður sem býður upp á flest það sem hugurinn girnist; sögufræg hús, söfn, lystigarð, golfvöll, kaffihús, verslanir og þjónustu. Skammt er í allar helstu náttúruperlur norðan heiða og skíðaparadís sem enginn verður svikinn af.

Sigrún Björk Jakobsdóttir er hótelstjóri á Icelandair Hótel Akureyri. Hún hefur margra ára reynslu úr ferðabransanum bæði sem hótelstjóri og í sölu Íslandsferða   en hún útskrifaðist úr IHTTI hótelstjórnunarskólanum í Sviss árið 1990. Að hennar mati er Glérárgilið eitt best geymda leyndarmálið á Akureyri en það er staðsett í miðjum bænum og gaman að rölta þar um  á góðum degi. Göngustígakerfi bæjarins er gott og tilvalið að byrja daginn á skokkhring í næsta nágrenni hótelsins.

Útsýni frá hótelinu er stórkostlegt en  ef menn vilja sjá á tiltölulega auðveldan hátt meira af bænum og Eyjafirði þá er gaman að ganga á Fálkafellið og þaðan inní Kjarnaskóg.  En skógurinn er yndislegur allan ársins hring og mikið aðdráttarafl á svæðinu. Yfir sumartímann er hægt að njóta veðurblíðunnar og fara í skemmtilega göngutúra og yfir vetrartímann er upplýst braut fyrir þá sem eru á gönguskíðum.

Helstu áhugamál hennar eru m.a skokk og lestur en hún er í leshring með skemmtilegum konum fyrir norðan sem hittast reglulega. Sigrún Björk er einnig mikill ferðalangur en hún byrjaði sitt heimshornaflakk 19 ára gömul og hefur komið víða við síðan þá og stefnir á að taka bakpokann aftur fram í framtíðinni og verður þá Suður-Ameríka líklegast fyrir valinu.

Sigrún Björk býður ykkur velkomin á Icelandair Hótel Akureyri.